د سرطان ناروغۍ سره دمبارزې نړیواله ورځ د یوې غونډې په ترڅ کې ونمانځل شوه
چهارشنبه 17 رجب المرجب 1444
د عامې روغتیا وزارت له لوري د سرطان ناروغۍ سره د مبارزې نړیواله ورځ د عامه پوهاوي د کچې لوړوالي او د سرطاني ناروغانو وضعیت ته د رسېدنې په موخه د یوې غونډې په ترڅ کې ونماځل شوه.
د عامې روغتیا وزارت د عرضه خدماتو معین، ښاغلي مولوي حبیب الله اخندزاده یادې غونډې ته په وینا کې وویل: (د سرطان ناروغي یو له عمده ستونزو څخه ده چې په نړۍ کې ۴۴ میلیونه کسان په دې ناروغۍ اخته دي، په ۲۰۲۰م کال کې د روغتیا نړیوال سازمان د اټکل له مخې په نړۍ کې ۱۹ میلیونه نوې د سرطان پېښې ثبت شوې دي چې له دې ډلې ۱۰ میلیونه کسانو خپل ژوند له لاسه ورکړی او د مړینې له هرو شپږو پېښو څخه یوه یې د سرطان ناروغۍ له امله ده.)
د عرضه خدماتو ښاغلي معین زیاته کړه چې، اوسمهال د سرطان ناروغۍ د تشخیص او درملنې مراکز د جمهوریت روغتون په داخله او جراحۍ څانګه او همدارنګه دوه مرکزونه په بلخ او هرات ولایتونو کې فعال دي چې په ورځني ډول له ۳۰۰ څخه تر ۴۰۰ ناروغان دغو مرکزونو ته مراجعه کوي.
د یادونې وړ ده چې د عامې روغتیا وزارت په پلان کې لري چې د سرطان ناروغۍ د تشخیص او درملنې له یادو مراکزو څخه علاوه د هېواد په نورو ولایتونو کې هم یاد مراکز جوړ کړي.
