د بلخ ولایت په چهاربولک ولسوالۍ کي د ۳ میلیونه افغانیو په لګښت یو روغتیايي مرکز جوړ او ګټې اخیستنې ته وسپارل شو
د عامې روغتیا وزارت د پلان او پالیسۍ مرستیال، ډاکټر محمد حسن غیاثي او ورسره مل پلاوي بلخ ولایت ته د سفر په ترڅ کې د چهاربولک ولسوالۍ په بیست پیکال کلي کې د ۳ میلیونه افغانیو په لګښت د یو روغتیايي مرکز پرانیسته ترسره او ګټې اخیستنې ته وسپارل شو.
د عامې روغتیا وزارت د پلان او پالیسۍ مرستیال، ډاکټر محمد حسن غیاثي د یاد روغتیايي مرکز پرانیسته د چهاربولک ولسوالۍ د اوسېدونکو لپاره یو ستر زېری وګاڼه او و یې ویل: ( د عامې روغتیا وزارت ژمن دی چې د هېواد ټولو لېرې او نېږدې سیمو کې هېوادوالو ته د معیاري روغتیايي خدماتو زمینه برابره کړي.)
د یاد روغتیايي مرکز په توسط به د لس کلیو شاوخوا ۷۵۰۰ اوسېدونکي له معیاري روغتیايي خدماتو برخمن شي.
د یادونې وړ ده، چې په یاد روغتیايي مرکز کې به د نارینه او ښځینه اړوند معاینات، تغذیه، واکسین،د زېږون او نورو برخو معیاري روغتیايي خدمتونه په وړیا ډول وړاندې شي.
