د افغانستان اسلامي امارت د عامې روغتیا وزیر، ښاغلي ډاکټر قلندر عباد په مالیزیا کې د افغانستان لپاره د مالیزیا له ځانګړي استازي ښاغلي داتو احمد اعظم سره ولیدل
ياده ليدنه چې په کوالالمپور مالیزیا کې د ا.ا.ا. لوی سفارت کې ترسره شوه، په ماليزيا هيواد کې د افغانستان د سفارت سرپرست ښاغلي نقیب الله احمدي هم ګډون درلود!
د افغانستان اسلامي امارت د عامې روغتيا وزير ډاکټر قلندر عباد له ښاغلي داتو اعظم سره په ليدنه کې وويل، افغانستان د آسیا د زړه په توګه خورا مهم هېواد دی، دا چې افغانستان یو خپلواک او بې پری هېواد دی، له افغانستان څخه هیڅ هېواد ته خطر متوجه نه دی، د هر ډول مثبت تعامل لپاره د افغانستان دروازې د ټولو پرمخ خلاصې دي.
په نشه یی توکو د روږدو کسانو په درمنله کې شل کاله غرب او تېر حکومت ونه توانېد چې مخه یې ونیسي، خو مونږ په کمه موده کې په نشه یي موادو د روږدو کسانو درملنه وکړه او د دې سترې ستونزې مخه مو ونیوله.
ښاغلي عباد زياته کړه ، په روغتیا وزارت کې اوسمهال له مونږ سره په زرګونه نارينه کارکوونکي او ښځینه کارکوونکې په دندو بوختې دي او ترڅنګ یې په مختلفو برخو کې روزل کیږي.
مالیزیا زمونږ دوست او مسلمان ورور هېواد دی چې د روغتيا په برخه کې د تلپاتې همکارۍ او دوه اړخيزه اړيکو لپاره به لا کار کوو!
ښاغلي داتو اعظم د مجلس په جريان کې ښاغلي وزير ته ډاډ ورکړ چې د ماليزيا هيواد دولت به د روغتيا تر څنګ په نورو ډيرو برخو کې له افغانستان سره مل اوسي هغه په خپلو خبرو کې ياد سفر مهم وباله او د لا دوامدارو اړيکو په مؤثريت يې خپل نظر څرګند کړ.
