د پالیسۍ او پلان مرستیال د کندز له والي سره وکتل
پنجشنبه، سلواغه ٢٨/١٤٠٠
د عامې روغتیا وزارت د پالیسۍ او پلان مرستیال ډاكتر محمد حسن غیاثي او ورسره مل ټیم یې د یوه رسمي سفر په ترڅ کې کندز ولایت ته تللي دي او په یوه ناسته کې د کندز له والي ښاغلي ملا نثار احمد نصرت سره لیدنه او خبرې کړي دي.
په دغه لیدنه کې دواړه لورو د روغتیایي خدمتونو وړاندې کولو پر ښه کولو، د روغتیایي کارکوونکو د معاشونو ورکړه، په نشه یي توکو د روږدو درملنه، باکیفیته درملو او په ځینو ولسوالیو کې د روغتیایي مرکزونو د جوړولو په اړه خبرې وکړې او د دغه ولایت والي د عامې روغتیا وزارت له مشرتابه څخه وغوښتل چې د روغتیایي خدمتونو وړاندې کولو د کیفیت لوړولو او د کندز خلکو روغتیایي وضعیت لا زیاته پاملرنه وکړي.
د پالیسۍ او پلان مرستیال په دغه ولایت کې د روغتیایي کارکوونکو له هلو ځلو مننه او قدر داني وکړه، ژمنه یې وکړه چې د عامې روغتیا وزارت ژمن دی څو د روغتیایي خدمتونو وړاندې کولو د کیفیت ښه کولو، د کار کوونکو معاشونو د ورکړې، په نشه یي توکو د روږدو درملنې او په دغه ولایت کې د روغتیایي مرکزونو د جوړولو په برخه کې هغه څه چې د روغتیا وزارت په توان کې دي کوټلي ګامونه به پورته کړي چې په دې برخه کې هڅې روانې دي.
