د پالیسي او پلان مرستیال او مل پلاوي د روغتیايي خدمتونو وړاندې کولو د پلي کوونکو بنسټونو له مسوولینو سره وکتل
سه شنبه، کب ۳/۱۴۰۰
د عامې روغتیا وزارت د پالیسۍ او پلان مرستیال ډاکتر محمد حسن غیاثي او مل پلاوي بلخ ولایت ته د خپل سفر په لړکې د روغتیايي خدمتونو د وړاندې کولو د پلي کوونکو بنسټونو له استازو سره لیدنه او خبرې وکړې.
په دغه لیدنه کې د عامې روغتیا وزارت مشرتابه پلاوي له خوا د بلخ ولایت له بېلابېلو روغتیايي مرکزونو څخه د ترسره شویو ارزونو پایلې له دوی سره شریکې شوې او د تطبیق کوونکو بنسټونو روغتیايي مسوولینو ته لارښوونه وشوه چې د روغتیايي مرکزونو ستونزې دې د عامې روغتیا وزارت سره د شوي قرارد له مخې حل کړي که نه نو له دوی سره به قانوني چلند وشي.
همدارنګه په دې ناسته کې د تطبیق کوونکو بنسټونو مسوولیتونه او دندې چې دوی پورې اړه مسوولینو ته تشریح شوې او له هغوی وغوښتل شول چې د عامې روغتیا ریاست سره د راپور ورکولو، په رسمي ناستو کې ګډون، ګډې څارنې، لا همغږي او د مېزلس واکسین کمپاین پیلولو برخه کې د بلخ عامې روغتیا ریاست سره هراړخیزه همکاري وکړي.
له بلې خوا د تطبیق کوونکو بنسټونو مسوولینو خپل نظریات او وړاندیزونه د عامې روغتیا وزارت له مشرتابه سره شریک کړل او ژمنه یې وکړه چې د روغتیا په برخه کې د شته ننګونو د ښه والي او حل په موخه به د بلخ د عامې روغتیا ریاست او د عامې روغتیا وزارت سره همکار دي او په دې برخه کې به هېڅ ډول هڅه ونه سپموي.
