د عامې روغتیا وزارت د پلاستیکي جراحۍ متخصص ډاکټر عبدالغفار غیور د کار ستاینه وکړه
سه شنبه، ثور ٦/ ١٤٠١
د عامې روغتیا وزارت په هغې غونډه کې چې د دغه وزارت د مرستیالانو او رئیسانو په ګډون جوړه شوې وه، د پلاستیکي جراح ډاکټر عبدالغفار غیور د کار ستاینه وکړه.
د عامې روغتیا وزارت مالي او اداري مرستیال مولوي محمد اسحق عاصم په دې اړه جوړې شوې غونډې ته وویل: نن د خوښۍ ځای دی چې دا ډول کدرونه او متخصصین له بهر څخه خپل هېواد ته راستانه شوي دي. خپلو اړو هیوادوالو ته د خدمت یوه سرچینه ګرځي."
د عامې روغتيا وزارت مرستيال زیاته کړه: موږ له خپلو صحي متخصصینو او په بهر کې میشتو کدرونو څخه غوښتنه کوو چې اسلامي امارت اوس په هیواد کې د دوی د خدمت لپاره ټوله زمینه برابره کړي تر څو ټول هیواد ته راستانه شي. وطن او خپلو وطنوالو ته خدمت وکړي.
په دې غونډه کې د عامې روغتیا وزارت د پالیسۍ او پلان مرستیال ډاکټر محمد حسن غیاثي د ډاکټر غیور د کار له امله مننه وکړه او وې ویل: له نېکه مرغه نن ورځ په هېواد کې دننه د ټولو افغانانو لپاره د خدمت زمینه برابره ده. دا چې دوی کولی شي خپلو خلکو ته خدمت وکړي او موږ له خپلو ټولو تجربه لرونکو او متخصصینو څخه چې په بهر کې ژوند کوي غوښتنه کوو چې یوځای شي او خپل هیواد جوړ کړي.
له بلې خوا ډاکټر عبدالغفار غیور د عامې روغتیا وزارت د رهبرۍ له هڅونې او باور څخه مننه او قدرداني وکړه او زیاته یې کړه، چې په قندوز، کابل، هلمند او ننګرهار کې مې په وړیا ډول ١٨٥ عملياتونه کړي دي او ژمنه کوم، چې د روزنې په برخه کې به هیڅ ډول هڅې ونه سپموم.
