د عامې روغتیا وزارت مالي او اداري معین، مولوي محمد اسحق صاحبزاده بلخ ولایت ته د سفر په ترڅ کې د دې ولایت د کود برق ۵۰ بستریز روغتون پرانیسته ترسره کړه
مالي او اداري معین، مولوي محمد اسحق صاحبزاده یادو مراسمو ته په وینا کې وویل، دغه روغتون په عصري او مجهزو وسایلو سمبال دی او وروسته له دې به د دې سیمې د اوسېدونکو شته روغتیايي ستونزې حل کړي.
ښاغلي معین همدا راز زیاته کړه، اسلامي امارت ژمن دی چي د هېواد ټولو وګړو ته معیاري، عادلانه روغتیايي خدمات وړاندې کړي او اسلامي امارت دې برخې ته پوره متوجه ده.
د یادونې وړ ده چې دغه روغتون د عمومي داخله، کوچنیانو داخله، جراحي، ارتوپیدي، مجهز لابراتوار، ډیجیټل اکسرې، درملتون او نورې مجهزې برخې لري چې د افغانستان اسلامي امارت په داخلي بودیجه د ۶۵ مېلیونه افغانیو په لګښت سره جوړ او تجهیز شوی دی.
