د خوړو او درملو معینیت د ۱۲۰ کارکوونکو لپاره د مجاز درملو د ملي نوملړ په اړه درې ورځنی روزنیز پروګرام پیل کړ
د عامې روغتیا وزارت د خوړو او درملو معینیت د بېلابېلو ریاستونو ۱۲۰ تنو کارکوونکو ته «په برېښنايي تنظیمي پروسو کې د مجاز درملو له نوملړ څخه د ګټې اخیستنې» په موخه درې ورځنی روزنیز پروګرام پیل شو
د دغه پروګرام موخه د کارکوونکو ظرفیت لوړول، د مجاز درملو د ملي نوملړ کارونې برخه کې د همغږۍ رامنځته کول او د درملو د تنظیمي چارو ډیجیټلي پروسو پیاوړتیا ده.
د ياد پروګرام پرانیستې مراسمو کې د خوړو او درملو مرستیال، ښاغلي مولوي حمدالله زاهد د درملو د تنظیم چارو کې د مجاز درملو ملي نوملړ د اهمیت تر څنګ د دغه نوملړ پر اغېزمنې او شفافې کارونې ټینګار وکړ.
دغه روزنیز پروګرام چې د خوړو او درملو معینیت د ظرفیت لوړونې څانګې له لوري، د روغتیا نړیوال سازمان (WHO) په همکارۍ جوړ شوی، په ترڅ کې به يې ګډونوال د مجاز درملو له ملي نوملړ، له برېښنايي سیستم يې، موخو، جوړښت او په تنظیمي پروسو کې يې له کارونې سره آشنا شي او د دغه سیستم د عملي کارونې لارې چارې به زده کړي.
