کابل ښار کې ١٤١ ټنه بې کیفیته او تاريخ تېره خوراکي توکي راټول او له منځه يوړل شول
سه شنبه، جوزا ۱۰ / ۱۴۰۱
د عامې روغتیا وزارت د خوراکي توکو د خوندیتوب آمريت او صحت محيطي رياست د بې کیفیته او تاريخ تېر خوراکي توکو د راټولولو او ضایع کولو په برخه کې د خپلو فعالیتونو په ترڅ کې دا ځل د کابل له بېلابېلو سیمو څخه ۱۴۱ ټنه بې کیفیته او تاريخ تېر خواړه راټول او له منځه يوړل.
په دغو موادو کې غير الکولي مشروبات، قيماق، ټي وايټنر، کنسر، غوښه او نور هغه مواد شامل دي چې مخکې د دغې ادارې د کنټرول او څيړنې په بهيرکې د کابل له بيلابيلو سيمو څخه راټول شوي وو او د ګزک په ساحه کې د يوه ځانګړي هيئت په شتون کې له منځه يوړل شول.
له بلې خوا د عامې روغتیا وزارت د صحت محيطي ریاست مسوولینو له خلکو غوښتي، چې د بې کیفیته او تاريخ تيرو توکو راټولولو په برخه کې همکاري وکړي، څو خلک له بېلابېلو ناروغیو وژغورل شي.
