د عامې روغتیا نوماند وزیر د غور ولایت والي، استازو او مخورو خلکو سره وکتل
د عامې روغتیا وزارت نوماند وزیر ډاکټر احمد جواد عثماني غور ولایت ته د خپل سفر په لړ کې له والي، په ملي او ولایتي شورأ کې د یاد ولایت استازو، مخورو خلکو، مشرانو او مدني ټولنې استازو سره له نږدې بحث او خبرې وکړې.
په دغه لیدنه کې، د غور والي د دې ولایت مشرانو او مخورو د روغتیا نوماند وزیر سره خپل وړاندیزونه او روغتیایي ستونزې شریکې کړې او د روغتیا وزارت له مشرتابه څخه یې د ستونزو د حل غوښتنه وکړه.
ډاکټر عثماني د غور ولایت د خلکو ستونزو او وړاندیزونو له اورېدو وروسته ژمنه وکړه چې د عامې روغتیا وزارت رهبري به روغتونونو او روغتیایي مرکزونو ته د درملو چمتو کولو، د ډاکټرانو ظرفیت لوړولو او مسلکي متخصصینو استخدامولو په برخه کې اړین او کوټلي ګامونه پورته کړي، تر څو ښه او اړین روغتیایي خدمتونو اړمنو ته وړاندې شي.
