د عامې روغتیا وزارت سرپرست د روغتیایي خدمتونو وړاندې کولو د پلي کوونکو مؤسسو له مسؤلینو سره وکتل
یکشنبه، وری ٢٢/١٤٠٠
د هېواد د عامې روغتیا وزارت سرپرست ډاکتر وحید مجروح؛ نن د یوې ناستې په ترڅ کې د روغتیايي خدمتونو د پلي کوونکو مؤسسو له مسؤلینو سره وکتل.
ډاکتر وحید مجروح، د روغتیا په سکتور کې د روغتیایي خدمتونو وړاندې کولو د پلي کوونکو مؤسسو رول مهم وباله او له دوی یې وغوښتل چې په راتلونکو پنځو ورځو کې دې خپل نظریات، وړاندیزونه او اساسي ننګونې دې د دغه وزارت له اړونده ادارو سره شریکې کړي ترڅو وړاندې شوې ننګونې په راتلونکو قراردادونو کې د دغه وزارت لخوا په ګوته او حل شي.
د عامې روغتیا سرپرست وزیر په ولایتونو کې د کورونا واکسین د تطبیق برخه کې د روغتیایي خدمتونو وړاندې کولو د پلي کوونکو مؤسسو له بې پامۍ څخه اندېښنه څرګنده کړه او دوی ته یې لارښوونه وکړه چې په دې ملي پروسه د کورونا واکسین د تطبیق برخه کې چې د خلکو جدي اړتیا ده ریښتینې هڅه او کار وکړي.
دغه راز ډاکتر وحید مجروح د دې وزارت د اړوندو ریاستونو له مسؤلینو وغوښتل چې د عامې روغتیا وزارت او د روغتیايي خدمتونو د پلي کوونکو مؤسسو له یو شمېر استازو څخه په ګډه یوه کمېټه جوړه کړي او روغتیایي خدمتونو وړاندې کولو د پلي کوونکو مؤسسو لپاره د مهمو معیارونو په ټاکلو باندې کار وکړي.
له بلې خوا د عامې روغتیا وزارت سرپرست په راتلونکو اونیو کې د روغتیا ملي جشنوارې د جوړولو او د روغتیا اوونۍ د نومول کېدو خبر ورکړ او له دغو مؤسسو یې وغوښتل چې په دې برخه کې د عامې روغتیا وزارت سره بشپړه همکاري وکړي.
همدارنګه په دې ناسته کې د روغتیایي خدمتونو وړاندې کولو پلي کوونکو مؤسسو استازو خپل نظریات او د شته ننګونو په ځانګړي ډول د نا امنۍ په اړه وړاندیزونه د عامې روغتیا وزارت له مشرتابه سره شریک کړل او د دغه وزارت د همکارۍ غوښتونکي شول.
