جلالتمآب جمهوررئیس محمد اشرف غني د کنړ ولایت د ۲۰۰ بستریز روغتون بنسټ ډبره او د عامې روغتیا اداري تعمیر پرانېست
١٥ حوت ١٣٩٧ د افغانستان د اسلامي جمهوریت جلالتمآب جمهور رئیس محمد اشرف غني نن سهار د کنړ ولایت مرکز اسعد آباد ته له رسېدو وروسته د دغه ولایت د ۲۰۰ بستریز روغتون بنسټ ډبره کېښوده.
جمهوررئیس د یاد روغتون د بنسټ ډبرې له اېښودلو وروسته وویل، دا د یو بنسټیز بدلون پیل دی او هیله لرم چې د دغه روغتون بېلا بېلې برخې د کنړ د شخصیتونو په نوم ونومول شي.
د کنړ۲۰۰ بستریز روغتون پر ودانی ۳۶۰ میلیون افغانۍ لګښت راځي چې د افغانستان حکومت له بودجې ورکول کېږي.
دغه راز د افغانستان د اسلامي جمهوریت جلالتمآب جمهور رئیس محمد اشرف د عامې روغتیا اداري تعمیر پرانېست.
جمهوررئیس غني د یادې ودانۍ د پرانیستنې پر مهال ډاکټرانو ته د مبارکۍ ترڅنګ وویل: عامې روغتیا وزارت ته مې لارښوونه ده چې د تجهیز او د خدماتو د کیفیت په لوړولو تمرکز وکړي.
د کونړ ولایت د عامې روغتیا اداري ودانۍ چې د جمهور رئیس له خوا پرانیستل شوه او ګټې اخیستنې ته چمتو ده، له ۱۹۰۵۰۰۰۰ نورلس میلیونه او پنځوس زره افغانیو په لګښت په معیاري ډول جوړه شوې.
