د روغتیايي پراختیا او پالیسۍ مرستیال په تورخم کې د تطبیق کوونکو مؤسسو له استازو سره وکتل
د عامې روغتیا وزارت د روغتیايي پراختیا او پالیسۍ مرستیال، ښاغلي ډاکتر محمد حسن غیاثي ننګرهار ولایت ته د خپل سفر په ترڅ کې په تورخم کې د بېرته راستنېدونکو هېوادوالو لپاره د روغتیايي خدمتونو د ښه والي او تنظیم په موخه د تطبیق کوونکو مؤسسو له استازو سره د همغږۍ ناسته ترسره کړه
په دې ناسته کې د عامې روغتیا وزارت تخنیکي ټیم سربېره د ننګرهار د عامې روغتیا رئیس، مولوي امین الله شریف او د تطبیق کوونکو مؤسسو استازو شتون درلود.
د عامې روغتیا وزارت د روغتیايي پراختیا او پالیسۍ مرستیال، ښاغلي ډاکتر محمد حسن غیاثي په تورخم کې د بېرته راستنېدونکو هېوادوالو لپاره د روغتیایي خدمتونو د وړاندې کولو په برخه کې ستونزې او نیمګړتیاوې د یادې ناستې له ګډونوالو سره شریکې کړې او مسؤلینو ته یې د حل په موخه لازمې سپارښتنې ترسره کړې.
نوموړي همداراز له ټولو هغو مسؤلینو څخه، چې په تېر کې یې بېرته راستنېدونکو هېوادوالو د روغتیا په برخه کې خدمات ترسره کړي مننه وکړه او په راتلونکي کې یې د لا چمتووالي لارښوونه وکړه.
له بل لوري د ننګرهار د عامې روغتیا رئیس، مولوي امین الله شریف د عامې روغتیا وزارت د روغتیايي پراختیا او پالیسۍ له مرستیال څخه دې ولایت د نوموړي له سفر څخه، چې د روغتیايي خدمتونو د ارزونې او ستونزو د حل په موخه یې ترسره کړی و مننه وکړه او په راتلونکي کې د بېرته راستنېدونکو هېوادوالو لپاره د غوره روغتیايي خدمتونو د وړاندې کولو په برخه کې د لا چمتووالي ډاډ ورکړ.
