د ترافیک پولیسو ۱۰۰ تنو ته د سړکونو د خوندیتوب او لومړنیو روغتیايي مرستو د زده کړې په موخه ورکشاپ ترسره شو
د عامې روغتیا وزارت د ناروغیو د مخنیوي او کنټرول لوی ریاست له لوري د ترافیک پولیسو ۱۰۰ تنو ته د دوه جلا دورو په لړ کې د سړکونو د خوندیتوب او لومړنیو روغتیايي مرستو د زده کړې په موخه دوه ورځنی روزنیز ورکشاپ ترسره شو
د عامې روغتیا وزارت د غیر ساري ناروغیو د مخنیوي او کنټرول مسؤل، ډاکټر محمد سمیع کریمي د ترافیکي پېښو په کنټرول کې د ترافیک پولیسو رول اړین وباله او هغوۍ ته یې د لومړنیو روغتیايي مرستو په اړه زده کړې يو اړین امر یاد کړ.
ډاکټر سمیع زیاته کړه، سیمې ته د روغتیايي کارکوونکو او امبولانس تر راتګ ټپیانو ته رسېدنه، د سختې وینې بهېدنې مخه نیول او روغتونونو ته په سمه توګه د ټپیانو لېږدول د ترافیک پولیسو له دندو څخه دي.
