د پالیسۍ او پلان مرستیال او مل پلاوي د مولانا نړیوال خصوصي روغتون څخه لیدنه وکړه
دوشنبه، کب ٢/١٤٠٠
د عامې روغتیا وزارت د پالیسۍ او پلان مرستیال ډاکتر محمد حسن غیاثي او ورسره مل ټیم د بلخ ولایت د مولانا نړیوال خصوصي روغتون څخه لیدنه وکړه او په دغه روغتون کې یې د روغتیايي خدمتونو له وړاندې کول له نږدې څخه وارزول.
په دې ارزونه کې د عامې روغتیا وزارت مشرتابه د مولانا روغتون له بېلابېلو څانګو څخه لیدنه وکړه او له ارزونې وروسته یې پایلې د قناعت وړ وبللې.
دغه راز مشرتابه چې د روغتون له ارزونې وروسته کومې ستونزې وموندلې د روغتون له مسوولینو سره شریکې کړې او لارښوونه یې وکړه چې د حل په موخه یې ورته رسیدګي وکړي، تر څو اړمنو کسانو ته د معیاري او باکیفیته روغتیايي خدمتونو د وړاندې کولو زمینه برابره شي.
له بلې خوا د عامې روغتیا وزارت د روغتیایي قوانینو د تطبیق د اروزنې رئیس ډاکتر سید رسول منګل د بلخ ولایت د میرسالار خصوصي روغتون له بېلابېلو برخو څخه لیدنه وکړه او په دغه روغتون کې یې د روغتیايي خدمتونو د وړاندې کولو چارې له نږدې وارزولې.
ډاکتر منګل او مل ټیم تر خپلو ارزونو وروسته د روغتون څو وارډونه د روغتیایي سرغړونو له امله وتړل او د روغتون مسوولینو ته یې لارښوونه وکړه، چې د عامې روغتیا وزارت له معیارونو سره سم خپل روغتیايي خدمتونه وړاندې کړي، که نه نو له جدي او قانوني چلند سره به مخ شي.
