د "درملو پر وړاندې د میکروب د مقاومت" نړیواله اوونه ونمانځل شوه
د افغانستان اسلامي امارت د عامې روغتیا وزارت له لوري د "درملو پر وړاندې د میکروب د مقاومت" نړیواله اوونۍ د یو لړ مراسمو په ترڅ کې ونمانځل شوه.
په دغه مراسمو کې د عامې روغتیا وزارت مرکزي رئیسانو، د یو شمېر مؤسسو استازو او روغتیاپالانو ګډون کړی و.
په یادو مراسمو کې د عامې روغتیا وزارت د معالجوي طب عمومي رئیس، ډاکټر وحدت الکوزي د درملو پر وړاندې د میکروب د مقاومت په تاریخچې، زیانونو او د مخنیوي په لارو چارو خبرې وکړې.
ښاغلي الکوزي وویل: د عامې روغتیا وزارت په پام کې لري، چې د میکروبي ناروغیو د مخنیوي، درملنې لپاره معیاري لایحه، روغتیايي مرکزونو کې د انټي بیوټیکو د زیاتې کارونې پر څار او په دې برخه کې د عامه پوهاوي پروګرامونه جوړ کړي؛ څو له مخې یې د درملو پر وړاندې د میکروب د مقاومت کچه راکمه شي.
په یادو مراسمو کې همداراز د تشخیصیه روغتیايي خدمتونو رئیس ډاکټر احمد ناصر حنفي، د مرکزي لابراتوارونو او د کیفیت د ښه والي او ناروغ د خوندیتوب آمریتونو له لوري ګډونوالو ته هر اړخیزې پریزنټیشنې وړاندې شوې، چې په کې د درملو پر وړاندې د میکروب د مقاومت پېژندنه،زیانونه، د مخنیوي لارې چارې، غوښتنې او لارښوونې شاملې وې.
