د فراه ولایت د عامې روغتیا رئیس په دغه ولایت کې د خصوصي روغتیايي مرکزونو له مسؤلینو سره لیدنه وکړه
د فراه ولایت د عامې روغتیا رئیس مولوي شیخ میر "صدام" په خپل کاري دفتر کې د خصوصي روغتیايي مرکزونو، روغتیايي تآسیساتو او د درملو عمده پلورنځیو له مسؤلینو او د دغه مراکزو د اتحادیې له مشر ډاکټر نوروز "صدیقي" سره لیدنه تر سره کړه
د دې ناستې موخه هېواد ته د درملو د قاچاق مخنیوي لپاره د نوي طرزالعمل تشریح او د پلي کېدو څرنګوالی و، چې په اړه یې د خصوصي روغتیايي مرکزونو له مسؤلینو سره د فراه د عامې روغتیا رئیس هر اړخیز معلومات شریک کړل او ویې ویل: "د ټیټ کیفیت لرونکو درملو له واردولو څخه ډډه وکړئ؛ ترڅو هېوادوال باکیفیته او خوندي درمل ترلاسه کړي".
د ناستې ګډونوالو هم د نوي طرزالعمل په پلي کېدو خوښي څرګنده او د عامې روغتیا رئیس ته یې ډاډ ورکړ، چې دوی به د خلکو د خوندیتوب د تآمین لپاره د ټیټ کیفیت لرونکو درملو له واردولو څخه په کلکه ډډه وکړي.
