د افغانستان او بېلاروس ترمنځ د روغتیايي همکاریو د پراختیا په اړه هوکړه وشوه
د افغانستان ا.ا. د عامې روغتیا وزیر، ښاغلي مولوي نور جلال جلالي بېلاروس ته د خپل رسمي سفر په ترڅ کې د دغه هېواد د روغتیا له وزیر، ښاغلي هودژایف الکساندر سره د روغتيايي همکاريو د پراختيا په موخه لیدنه وکړه
په دې لیدنه کې افغانستان ته د درملو واردولو، طبي تجهیزاتو، د روغتیايي کارکوونکو د مسلکي ظرفیت لوړونې او د څېړنیزو معلوماتو د تبادلې په ګډون پر بېلابېلو روغتیايي موضوعاتو بحث او خبرې وشوې.
د عامې روغتيا وزير، ښاغلي مولوي نور جلال جلالي په دې لیدنه کې وویل: د افغانستان ا.ا. د عامې روغتیا وزارت هڅه کوي له بېلابېلو هېوادونو سره د روغتیايي همکاریو کچه پراخه کړي او د مسلکي تجربو، طبي تجهیزاتو، درملو او روغتیايي خدمتونو په برخو کې د همکاریو له پراختیا څخه د هېواد د روغتیايي نظام د پیاوړتیا لپاره ګټه واخلي.
بل لور، د بېلاروس د روغتیا وزیر، ښاغلي هودژایف الکساندر هم د افغانستان له روغتیايي سکتور سره همکاریو ته په اشارې وویل: هېواد یې چمتو دی، چې د درملو، طبي تجهیزاتو، روغتیايي کارکوونکو د ظرفیت لوړونې او د مسلکي او علمي تجربو د تبادلې په برخو کې له افغانستان سره خپلې همکارۍ پراخې کړي.
د دغې لیدنې په پای کې د افغانستان او بېلاروس ترمنځ د روغتیايي همکاریو د پراختیا، درملو او طبي تجهیزاتو، روغتیايي کارکوونکو د ظرفیت لوړونې او د علمي او څېړنیزو معلوماتو د تبادلې په برخو کې د دوه اړخیزو همکاریو پر پراختیا هوکړه وشوه.
