د عامې روغتیا وزارت سرپرست په پنځم طبي نندارتون کې ګډون وکړ
سه شنبه، کب ٢٤/۱۴۰۰
د عامې روغتیا وزارت سرپرست ډاکتر قلندر عباد، په کابل کې د جوړ شوي طبي نندارتون په پنځم پړاو کې ګډون وکړ.
په دې نندارتون کې لاسته راوړنې، تجهیزات او تولید شوي درمل نندارې ته اېښودل شوي دي.
د عامې روغتیا وزارت سرپرست په افغانستان کې د درملو پر پیاوړتیا ټینګار وکړ او د دغه نندارتون پرانیستل یې د روغتیا په برخه کې د پانګونې د پیاوړتیا لپاره یو ښه فُرصت وباله.
هغه همدارنګه وويل: چې دا ډول نندارتونونه د پانګوالو لپاره ښه فرصت او مثبته سيالي رامنځته کوي.
ډاکتر عباد وويل: چې په تېرو شلو کلونو کې د روغتيا په برخه کې ډېرې پيسې لګول شوې دي، خو د پراخ فساد له امله د روغتیا په برخه کې هېڅ ډول لاسته راوړنه او پرمختګ نه دی شوی.
د عامې روغتیا وزارت سرپرست زیاته کړه، چې د افغانستان اسلامي امارت د روغتیايي خدمتونو د وړاندې کولو لپاره ژمن دی او موږ د روغتیا د بېلابېلو برخو د پیاوړتیا لپاره هڅه کوو.
ډاکتر عباد د درملنې لپاره بهر ته د تلونکو کسانو په اړه خواشیني څرګنده کړه او ویې ویل چې موږ له طبي متخصصینو سره په همکارۍ هڅه کوو ترڅو خلکو ته په کور دننه د بېلابېلو ناروغیو د درملنې زمینه برابره کړو.
د عامې روغتیا وزارت سرپرست وویل: اسلامي امارت له کورنیو پانګوالو ملاتړ کوي او په هېواد کې دننه د درملو د فابریکو پیاوړتیا زموږ له لومړیتوبونو څخه ده.
