د وقایوي طب او ساري ناروغیو د کنټرول عمومي رئیس کاپیسا ولایت ته سفر تر سره کړ
د عامې روغتیا وزارت د وقایوي طب او ساري ناروغیو د کنټرول عمومي رئیس، ډاکټر حیدر خان حیدر کاپیسا ولایت ته د سفر په ترڅ کې د یاد ولایت د عامې روغتیا له رئیس، ډاکټر نیاز محمد مخلص سره لیدنه ترسره کړه
په دې لیدنه کې د روغتیايي خدمتونو وړاندې کولو، واکسین خدمتونو او د ساري ناروغیو د کنټرول او وقایې اړوند بحث او خبرې ترسره شوې.
ډاکټر حیدر خان حیدر یاد ولایت ته د سفر په ترڅ کې روغتونونه، روغتیایي مرکزونه او د عامې روغتیا ریاست د کتلوي معافیت آمریت له نږدې وکتل او د دغه ولایت روغتیايي کارکوونکو د فعالیتونو ستایلو سربېره یې مسؤلینو ته سپارښتنه وکړه، چې د ناروغانو روغتیایې ستونزو د حل او درملنې په برخه کې له هیڅ ډول هڅو او کوښښونو درېغ ونه کړي.
