له ۳۰۴ تنو نوماندانو څخه عملي (Comprehensive) ازموینه واخیستل شوه
د عامې روغتیا وزارت د اکمال تخصص لوی ریاست له لوري د ۱۴۴۶ هـ ق کال لپاره د مرکز کابل او ولایتونو له (۳۰۴) تنو نوماندانو څخه عملي (Comprehensive) ازموینه واخیستل شوه.
د اکمال تخصص لوی ریاست تل هڅه کړې د تخصصي برنامو د بډایه کولو لپاره علمي معیارونه پلي او د ډاکټرانو علمي کچه لوړه کړي؛ ترڅو هېوادوالو ته په کور دننه معیاري خدمات وړاندې شي، په همدې اساس د یوې شفافې پروسې له لارې هېواد ته د روزل شویو طبي متخصصینو د وړاندې کولو په موخه، د وزارت محترم مقام د حکم له مخې د ۱۲/۸/۱۴۰۳ نېټه، شنبې ورځ د تخصصي او ثالثي روغتونونو د محترمو استادانو په همکارۍ د مرکز کابل او ولایتونو له (۳۰۴) تنو هغه نوماندانو څخه چې په شرایطو برابر او په تحریري ازموینه کې بریالي شوي وو، د مرکز په تخصصي روغتونونو کې د چمتو شوي مهالویش له مخې ورڅخه عملي (Comprehensive) ازموینه واخیستل شوه.
د یادونې وړه ده، چې په یاده ازموینه کې (OSCE،Short Case، long Case) برخې شاملې دي، چې د OSCE برخې ازموینه د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت او د اکمال تخصص عمومي رئیس ډاکټر محمد حیدر عمر په شتون کې د مرکز کابل په څلورو تخصصي روغتونونو کې په پورته ذکر شوې نېټه واخیستل شوه.
