د عامې روغتیا وزیر د سیمې د روغتیايي مشرانو سره پر لیکه غونډه ترسره کړه
د ا.ا.ا د عامې روغتیا وزیر، ښاغلي مولوي نور جلال جلالي د سعودي عربستان، متحده عربي اماراتو او قطر هېواد د عامې روغتیا وزیرانو، د روغتیا نړیوال سازمان د ختیځې مدیترانې حوزې مشرې اغلې حنان بلخي او د ګیټس بنسټ مسؤلینو سره پر لیکه مجلس ترسره کړ:
په دې مجلس کې د پوليو واکسین کمپاین پر غوره تر سره کولو ، د تېرو کمپاینونو پر ننګونو ، د کارکوونکو ظرفیت لوړونې، د لا زیاتې همغږۍ او د روغتیایي خدماتو پر کیفیت لوړولو هر اړخیز بحث او خبرې ترسره شوې.
د عامې روغتیا وزیر ښاغلي مولوي نور جلال جلالي د افغانستان د عامې روغتیا برخه کې د ټولو له همکارۍ څخه مننه وکړه او زیاته یې کړه ، د پولیو او نورو ساري ناروغیو مخنیوي او له منځه وړلو لپاره به خپلو هڅو ته دوام ورکړي او په وینا یې په دې برخه کې د پام وړ پرمختګ شوی.
دغه راز ښاغلي وزیر وویل د عامې روغتیا وزارت ژمن دی، چې په ټولو روغتیایي برخو کې خلکو ته خدمات وړاندې کړي او په دې برخه کې لا زیاته همغږي او همکاري اړینه ده.
بل لور ته د سعودي عربستان، متحده عربي اماراتو او قطر هېواد د عامې روغتیا وزیرانو، د روغتیا نړیوال سازمان او ګیټس بنسټ مسؤلینو په یادو برخو کې د بشپړې همکارۍ ډاډ څرګند کړ او ویې ویل، د روغتیایي کارکوونکو روزنې او د پولیو له منځه وړلو برخه کې بشپړې همکارۍ ته چمتو یو.
