د عامې روغتیا وزارت د ظرفیت لوړونې ریاست د بېلابېلو ولایتونو ۲۰ تنه نرسانو ته د ځانګړو مراقبتونو (ICU) په برخه کې لس ورځینی روزنیز ورکشاپ ترسره کړ
دغه ورکشاپ چې موخه یې د ځانګړو مراقبتونو په برخه کې د نرسانو د وړتیاوو لوړول و، په مرکز کې ترسره شو چې له جوزجان، کاپیسا، بامیان، تخار، ننګرهار، بلخ، هلمند، کندوز، غزني، بادغیس، کونړ، پنجشیر، لغمان، پکتیا، میدان وردګ او پروان ولایتونو څخه په کې۲۰ تنه نرسانو ګډون کړی و.
د ورکشاپ په جریان کې، نرسانو د (ICU) په برخو کې د جدي ناروغانو د پاملرنې له پرمختللو مهارتونو او اصولو سره بلدتیا پیدا کړه، تر څو وکولای شي په ولایتي روغتونونو کې لا معیاري روغتیايي خدمتونه وړاندې کړي.
د عامې روغتیا وزارت مسؤلینو د دې ډول روزنیزو ورکشاپونو څخه د هرکلي ترڅنګ ټینګار وکړ، چې د روغتیايي کارکوونکو مسلکي زدهکړې د هېواد په کچه د روغتیايي خدمتونو د کیفیت په لوړولو کې مهم رول لري.
