د کندز ولایت د روږدو درملنې ۸۰ بستریز روغتون په انګړ کې د سالم او زرغون چاپېریال په موخه د نیالګیو کېنولو پروګرام پیل شو
د کندز ولایت د روږدو درملنې ۸۰ بستریز روغتون په انګړ کې د چاپېریال ساتنې او زرغونتیا فرهنګ د ودې په موخه د نیالګیو کېنولو پروګرام د یاد روغتون د ځینو مسؤلینو په شتون کې پیل شو.
په دې پروګرام کې یو شمېر زینتي نیالګي د روغتون په انګړ کې کېنول شول، چې د ناروغانو لپاره د یو سالم، تازه او هیله بښونکی چاپېریال په رامنځته کېدو کې د کارکوونکو ژمنتیا او د هغوی د مسؤلیت احساس څرګندوي.
د کندز ولایت د روږدو درملنې ۸۰ بستریز روغتون رهبرۍ د ناروغانو د روحي حالت او رواني روغتیا په ښه والي کې د سمسور او زرغون چاپېریال پر اهمیت ټینګار وکړ او دا اقدام یې د چاپېریال او روغتیايي خدمتونو په ښه والي کې یو مثبت ګام وباله او زیاته یې کړه، هیله ده چې د دې ډول پروګرامونو په دوام سره به روغتیايي مرکزونو کې سالم او زرغون چاپېریال رامنځته شي.
