د عامې روغتیا وزارت د داخلي تفتیش رئیس، مولوي محمد سلیم حقاني او مل پلاوي بادغیس ته د سفر په ترڅ کې د یاد ولایت له والي ملا محمد حنیف حمزه سره لیدنه ترسره کړه
په دې لیدنه کې چې د بادغیس د عامې روغتیا رئيس مولوي خان محمد همت هم شتون درلود، د روغتیایي خدماتو ښه والي او شته ستونزو د حل په اړه خبرې وشوې؛ د بادغیس والي ملا محمد حنیف حمزه یاد پلاوي ته د هرکلي ویلو ترڅنګ ژمنه وکړه، چې ولایتي اداره به له مرکزي ادارې سره په ګډه د روغتیا برخې پیاوړتیا لپاره هلې ځلې کوي او زیاته یې کړه، د عامې روغتیا وزارت مسؤلینو دا ډول سفرونه د ستونزو حل او اسانتیاوو رامنځته کېدو لپاره مهم دي.
دغه راز، د عامې روغتیا وزارت د داخلي تفتیش رئیس د بادغیس د والي له همکارۍ څخه مننه وکړه او ویې وویل، د روغتیایي خدمتونو ښه والي په موخه به هر راز ستونزې په ګډه حلوي او هڅه کوي چې د بادغیس ولایت وضعیت ته په کتو روغتیا برخه کې د پام وړ بدلونونه راولي؛ څو خلکو ته لازمې اسانتیاوې رامنځته شي.
د یادونې وړ ده، چې یاد پلاوي د بادغیس د عامې روغتیا ریاست څخه هم ليدنه ترسره کړه، شته ستونزې یې په نښه او د حل په موخه یې له اړوندو مسؤلینو سره شریکې کړې؛ تر څو د خدماتو کیفیت لا ښه او اغېزمن شي.
