د عامې روغتیا وزارت له لوري د ۱۵۱ ميليونه او ۸۵۰ زره افغانيو په ارزښت د کندهار ولایت د عینو مېنې روغتون لپاره یوه پايه MRI او يوه پايه CT-Scan دستګاوې پېرل کېږي
عامې روغتیا وزارت د روغتیايي خدمتونو د پیاوړتیا او د ناروغیو د تشخیص په برخه کې د اسانتیاوو رامنځته کولو په موخه، د ۱۴۰۵ مالي کال له داخلي بودیجې څخه یوه پایه MRI 1.5 Tesla او یوه پایه CT-Scan 128 slice دستګاوو د چمتو کولو او پېرلو تدارکاتي پروسه پیل کړې ده.
د یادو دستګاوو د تدارک پروسه د یو سل یو پنځوس میلیونه اته سوه پنځوس زره افغانيو (151,850,000) په ارزښت، یوه افغان شرکت ته د تړون ورکړې په پړاو کې ده، چې د تدارک چارې به یې په نږدې ورځو کې بشپړې شي.
د دغو دستګاوو په برابرېدو سره به د عینو مېنې روغتون د تشخیصیه خدمتونو ظرفیت لوړ او ناروغانو ته به د معیاري خدمتونو وړاندې کولو زمینه برابره شي.
