د غزني ولایت د روږدو ناروغانو درملنې ۵۰ بستریز روغتون کې د لمریزې برېښنا سیسټم نصبولو او د څښاک د اوبو څاه کیندلو چارې پیل شوې
د غزني د عامې روغتیا رئیس، ډاکټر رسول خان نظري وویل: (د یاد ریاست د دوامداره هڅو پایله کې، د غزني ولایت د روږدو ناروغانو د درملنې ۵۰ بستریز روغتون لپاره د څښاک د اوبو څاه کیندلو کار د روغتیا نړیوال سازمان (WHO) اړوند د WASH پروګرام په مرسته منظور شوی او عملي چارې یې د ۲ میلیونه افغانیو په ارزښت پیل شوې).
ډاکټر نظري زیاته کړه، چې په دې پروژه کې د ۱۵ کیلو واټه لمریزې برېښنا سیسټم نصبول هم شامل دي، چې د UNDP په مالي ملاتړ او د عامې روغتیا ریاست په همکارۍ پلي کېږي.
دا سیسټم به یاد روغتون ته د اړتیا وړ برېښنا برابره کړي او د دولتي برېښنا مصرف کې به د پام وړ سپما رامنځته کړي.
