د عامې روغتیا نوماند وزیر د ملګرو ملتونو د پراختیایي ادارې له استازي سره خبرې وکړې
د عامې روغتیا نوماند وزیر ډاکټر احمد جواد عثماني نن د ویډیو کنفرانس له لارې په افغانستان کې د ملګرو ملتونو پراختیايي پروګرام (UNDP) له استازي سره د یوې ناستې په ترڅ کې بحث او خبرې وکړې.
په دې ناسته کې د عامې روغتیا نوماند وزیر خپل کاري پلانونه د ملګرو ملتونو د پراختیایي ادارې له استازي سره شریک کړل، او د هېواد روغتیا برخه کې د دې ادارې د لازیاتو همکاریو غوښتنه وکړه.
ډاکټر عثماني همدارنګه د ملګرو ملتونو پراختیايي پروګرام (UNDP) څخه وغوښتل چې د افغانستان روغتیا سکتور سره د کورونا ویروس تشخیص ظرفیت لوړولو، اړمنو ولایتونو کې لابراتوارونه جوړول، په روغتونونو کې د اکسیجن د تولید دستګاه وؤ نصب، په کورونو کې د کوویډ -١٩ ناروغانو درملنې په پار له روغتونونو سره مرسته وکړي.
په ورته وخت کې، (UNDP) ادارې استازي د عامې روغتیا وزارت نوماند له کاري برنامو څخه هرکلی وکړ او په ذکر شویو برخو کې یې د مرستې ژمنه وکړه.
