د عامې روغتیا وزارت د پراختیایي پروژو له مسؤولینو سره ناسته و شوه
چهارشنبه، چنګاښ ۱۶/۱۴۰۰
د عامې روغتیا وزارت مالي او اداري مرستیالې ډاکتر وږمه سالمي، په یوه ناسته کې د پراختیايي پروژو له استازو سره د عامې روغتیا وزارت پراختیایي پروژو کې د شاملو کار کوونکو د معاشونو د تادیه کولو په هکله لیدنه او خبرې وکړې.
په دغه لیدنه کې، مالي او اداري مرستیالې له مسؤولینو څخه وغوښتل ترڅو د هغه کارکوونکو ټول معاشونه چې له پراختیایي پروژو څخه یې ترلاسه کوي د يوې اونۍ په ترڅ کې دې تادیه کړي او په دې برخه کې هېڅ ډول ځنډ د منلو وړ نه دی.
ډاکتر سالمي، همدارنګه د پروژو له مسؤولینو وغوښتل چې د خپلو ادارو حکمي کار کوونکي دې د آزادې سیالۍ ترسره کېدو پورې د وزارت مقام ته پیشنهاد کړي، ترڅو د نوي کسانو تر ګمارنې پورې په دغه بستونو کې دوی له خپلو مالي حقوقو څخه برخمن شي.
د دې ناستې په دوام، مالي او اداري مرستیالې، د ادارو د راپور ورکولو، د قراردادونو اجرا کول چې قانوني ستونزې نه لري، د افرادو د وظیفوي تداخل مخنیوئ، د دندو د لایحو بیا کتنه چې نوې جوړېږي او همدارنګه د ۴۵ ورځو په ترڅ کې د ټولو پراختیایي کار کوونکو د ګمارنې پروسې د ترسره کولو په اړه له ګډونوالو سره خبرې او په دې برخه کې یې لازمې لارښوونې وکړې.
له بلې خوا، ګډونوالو د خپلو ادارو کاري پروسې د ښه والي په پار د عامې روغتیا وزارت مالي او اداري مرستیالې سره خپل نظریات او وړاندیزونه شریک کړل او د لا زیاتو همکاریو ژمنه یې وکړه.
