سمنګان ولایتي روغتون کې د هیمو ډیالیز مرکز پرانیسته ترسره شوه
د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي او ورسره مل پلاوي سمنګان ولایت ته د سفر په لړ کې د ډاکټر کرام الدین وکیل زاده ولایتي روغتون کې د هیمو ډیالیز مرکز پرانیسته ترسره او ګتې اخیستنې ته وسپارل شو
په همدې موخه جوړو شویو مراسمو کې د سمنګان والي ملا شعیب رسالت، د عامې روغتیا رئیس ملا محب الله بهاري او د دې ولایت د یو شمېر نورو ادارو مسؤلینو ګډون کړی و.
یاد مرکز د سمنګان ولایت عامې روغتیا ریاست په هڅو او د دغه ولایت د خیرخواه سوداګرو له لوري د ۱۰۰ زره ډالرو په لګښت د سمنګان ولایتي روغتون کې جوړ شوی، چې څلور خونې او څلور مجهز عصري ماشینونو او تجهیزات لري.
د عامې روغتیا وزارت د روغتیايي پراختیا او پالیسۍ مرستیال، ښاغلي ډاکټر محمد حسن غیاثي د یاد روغتیايي مرکز د جوړېدو برخه کې د دغه ولایت د اوسېدونکو همکاري وستایله او دا یې د پښتورګو ناروغانو ته د اسانتیاوو رامنځته کېدو او درملنې برخه کې یو مثبت او اغېزمن ګام وباله.
د روغتیايي پراختیا او پالیسۍ مرستیال همداراز د روغتیايي خدمتونو د پراختیا او معیاري کولو برخه کې د عامې روغتیا وزارت د ژمنتیا ډاډ ورکړ او له سوداګرو یې وغوښتل، چې په دې برخه کې د عامې روغتیا وزارت سره هر اړخیزه همکاري وکړي.
