د عامې روغتیا وزارت له لوري د ټولنې پر کچه د روغتیایي کارکوونکو د کړنو ارزونې او هڅونې تر سرلیک لاندې یو ورځنی روزنیز ورکشاپ ترسره شو
په دې ورکشاپ کې د عامې روغتیا وزارت مالي او اداري چارو مرستیال ښاغلي ملا بخت الرحمن شرافت، د وزارت یو شمېر مرکزي رئیسانو، روغتیایي شریکانو او روغتیا پالانو ګډون کړی و.
د عامې روغتیا وزارت مالي او اداري چارو مرستیال، ښاغلي ملا بخت الرحمن شرافت یاد پروګرام کې د وینا پرمهال د ټولنې پر کچه د روغتیایي کارکوونکو فعالیتونه د لومړنیو روغتیايي خدمتونو وړاندې کولو، وقایې، روغتیایي لګښتونو راکمولو، عامه پوهاوي او د ټولنې عمومي هوساینې لپاره اړین وبلل او د هغوۍ له هڅو یې د دوامداره ملاتړ ژمنه وکړه.
په دغه ورکشاپ کې چې د کابل ولایت د ټولنې پر کچه ۸۰ تنو روغتیایي کارکوونکو ګډون کړی و، خپل فعالیتونه شریک او د عامې روغتیا وزارت سره په ګډه همغږۍ یې ولسونو ته د لومړنیو روغتیايي خدمتونو وړاندې کولو برخه کې بشپړ ډاډ څرګند کړ.
