د عامې روغتیا وزارت د رهبرۍ بورډ شپاړسمه ناسته تر سره شوه
دا ناسته د عامې روغتیا وزیر، ښاغلي مولوي نور جلال جلالي په مشرۍ، د وزارت د مرستیالانو، مرکزي رئیسانو او مشاورینو په شتون کې ترسره شوه، چې په کې د تېرې ناستې د پرېکړو او په اړه یې د تر سره شویو اجرااتو، بېرته راستنېدونکو هېوادوالو ته د روغتیايي خدمتونو وړاندې کولو او اسلام قلعه بندر ته د امبولانسونو د لېږد او د نوي تدارکاتي قانون سره سم د تدارکاتي تړونونو د ورکړې او پروسې په اړه بحث او خبرې تر سره شوې.
سربېره پردې، د پروګرامونو، غونډو او ورکشاپونو د ښه والي او ښه ترسره کولو لپاره د ویاندویۍ، اطلاعاتو او عامه اړیکو ریاست سره د همغږۍ، د غیر مسلکي ډاکټرانو او حکیمانو سره د مرکو د مخنیوي، د شفري نسخو لیکلو څخه د مخنیوي، د مخابراتو او معلوماتي ټکنالوژۍ وزارت سره په روغتونونو کې د فیس راټولولو سیسټم ستونزې د حل کولو، او د عامې روغتیا وزارت د څارنې او پلټنې لوی ریاست له لوري د دایکندي ولایت نظارتي راپور تشریح کول د دې ناستې له نورو مهمو موضوعاتو څخه وو، چې په اړه یې بحث ترسره شو.
د عامې روغتیا وزیر، ښاغلي مولوي نور جلال جلالي د پورته ذکر شویو موضوعاتو د چارو چټکتیا په موخه بېلا بېلې تخنیکي کمېټې وګمارلې؛ ترڅو پر ټاکلي وخت او سمه توګه ورته رسېدنه وشي.
دغه راز، د عامې روغتیا وزارت مرستیالانو او مرکزي رئیسانو د هغه مسؤلیتونو برخه کې د پرمختګونو راپور وړاندې کړ، چې د رهبرۍ شورا په تېره ناسته کې دوی ته سپارل شوي وو او ټینګار وشو، چې ذکر شویو موضوعاتو ته پر ټاکلي وخت رسېدنه وشي.
