ښاغلی قاري عبدالولي صدیقي د عامې روغتیا وزارت د مالي او اداري چارو مرستیال په توګه معرفي شو
په همدې موخه جوړو شویو مراسمو کې د چارو ادارې لوی رییس، ښاغلي شیخ الحدیث نورالحق انور، د عامې روغتیا وزیر ښاغلي مولوي نور جلال جلالي، د بېلا بېلو امارتي ادارو مسؤلینو، د وزارت مرستیالانو، مرکزي رئیسانو او د عامې روغتیا وزارت یو شمېر کار کوونکو ګډون کړی وو.
په یاده غونډه کې، د چارو ادارې لوی رییس ښاغلي شیخ الحدیث نورالحق انور وویل: د عالیقدر امیرالمؤمنین حفظه الله د نوي حکم پر اساس، د اریانا افغان هوايي شرکت پخوانی رئیس قاري عبدالولي صدیقي د عامې روغتیا وزارت د مالي او اداري چارو مرستیال په توګه ټاکل شوی.
د چارو ادارې ښاغلي لوی رئیس په نظام کې تغیر او بدلون د اسلامي امارت یو اصل وګاڼه او زیاته یې کړه، چې موږ ټول د اسلامي امارت د مشرتابه د حکمونو اطاعت کوو؛ هغه قاري عبدالولي صدیقي یو پوه او تجربه لرونکی شخص وباله او د وزارت د پخواني مرستیال له هڅو څخه د مننې تر څنګ دواړو ته په خپلو نویو دندو کې د بریالیتوب هیله څرګنده کړه.
همدارنګه، د غونډې پر دوام د عامې روغتیا وزیر ښاغلي مولوي نور جلال جلالي وویل: «الله تعالی اسلامي نظام ته ژمن خلک ورکړي او هر یو ته یې مسؤلیتونه سپارلي دي. موږ ډېر کادرونه لرو او له هغوی غواړو چې په پوره ژمنتیا او هڅو خپلو خلکو ته خدمت وکړي.»
