د فراه د عامې روغتیا ریاست اړوند د روږدو درملنې ۸۰ بستریز روغتون کې ۴۶ تنه روږدي ناروغان له بشپړې درملنې وروسته خپلو کورنیو ته وسپارل شول
د فراه د عامې روغتیا رئیس، مولوي شیخ میر صدام وویل: دغه ۴۶ تنه روږدي د ۴۵ ورځنۍ درملنې وروسته د روږدو درملنې ځانګړي ۸۰ بستریز روغتون څخه رخصت او خپلو کورونو ته استول شوي دي.
نوموړي زیاته کړه، چې د دغو کسانو د بیا روږديتوب څخه د مخنیوي او د کارموندنې په موخه به ۴۰ تنو ته د درې میاشتنیو مسلکي روزنيزو پروګرامونو له لارې د نلدوانۍ، برېښنا، د لمرېزې برېښنا سیسټمونو نصبولو او د موټر سایکل ترمیم برخو کې زده کړې ورکړل شي، چې له فراغت وروسته به ورته د کار وسایل هم ووېشل شي.
همدارنګه، د فراه د روږدو درملنې ۸۰ بستریز روغتون مسؤل، استاد درویزه رسا وویل: د هغو کسانو سربېره چې په دغه روغتون کې یې درملنه شوې، ۸۰ کسان اوس مهال په روغتون کې، ۲۰ تنه نور په خپلو کورونو کې تر درملنې لاندې دي او ۷۰۰ تنه هغه چې له دې روغتون څخه مخکې رخصت شوي، د دوو پنځه کسیزو ټیمونو له لوري د یو کال لپاره په دوامداره توګه څارل کېږي.
د یادونې وړه ده، چې له دغه روغتون څخه رخصت شوي کسان به د یو کال لپاره د دوو پنځه کسیزو ټیمونو تر څارنې او نظارت لاندې وي.
