ماموریت داکتر نیکلاس تیلور مسوول تیم خدمات اساسی اتحادیه اروپا در افغانستان پایان یافت

وزارت صحت عامه جمهوری اسلامی افغانستان، از کارکردهای آقای نیکلاس تیلور مسوول تیم خدمات اساسی اتحادیه اروپا در افغانستان طی مراسمی قدردانی کرد.
آقای تیلور بیشتر از 13 سال در بخش های انکشافی و هم‌کاری‌های بشردوستانه در کشورهای مختلف ایفای وظیفه نموده است. او از ماه سپتمبر 2018 مسوولیت تیم خدمات اساسی اتحادیه اروپا در افغانستان به عهده داشت.
داکتر فیروزالدین فیروز وزیر صحت عامه کشور از کارکردها و تلاش‌های آقای نیکلاس تیلور به نیکی یاد کرده گفت: آقای تیلور یکی از هم‌کاران خوب وزارت صحت عامه بود و کارکردهای او در بخش صحت افغانستان قابل ستایش است. او از دانش، تخصص و مدیریت خوب برخوردار است. 
وزیر صحت عامه هم‌چنان علاوه نمود که، اتحادیه اروپا یکی از تمویل کننده‌گان مهم وزارت صحت عامه می‌باشد و اتحادیه اروپا بخش صحت افغانستان را از دیر زمانی کمک‌های مالی و تخنیکی می‌کند.
از سوی هم داکتر نیکلاس تیلور از رهبری وزارت صحت عامه در رابطه به تقدیر از کارکردهای وی تشکری نموده گفت که وزارت صحت عامه در سال‌های اخیر پیشرفت‌های خوبی در بهبود عرضه خدمات صحی به ویژه صحت مادر و نوزاد داشته است.