د هلمند عامې روغتیا ریاست په ۱۴۰۴ کال کې له زرګونو روغتیايي مرکزونو او پلورنځیو څخه نظارتونه ترسره کړي
د هلمند ولایت عامې روغتیا ریاست د څارنې او پلټنې مسؤلينو د درملو او خوراکي توکو د کيفيت کنټرول او روغتيايي قوانينو د پلي کولو په موخه د ۱۴۰۴ هـ ش کال په ترڅ کې د ياد ولايت په مرکز او ولسوالیو کې ۵۰۷۷ نظارتونه تر سره کړي دي.
په دې نظارتونو کې له ۲۹۵۶ درملتونونو، ۴۳۰ د درملو عمده پلورنځيو، ۱۸۰ خصوصي روغتيايي کتنځايونو، ۱۲۰ کلينيکونو، ۲۲۰ د سینګار توکو پلورنځيو، ۵۹۱ خوراکي توکو پلورنځيو او ۲۲۶ خوراکي توکو توليدي شرکتونو څخه نظارت ترسره شوی دی.
د يادو نظارتونو پايله کې ۲۰۹ درملتونونه له روغتيايي قوانينو څخه د سرغړونې له امله په مؤقت ډول تړل شوي او ۲۶۴۰ قلمه له نېټې تېر درمل راټول شوي دي.
همداراز، له خصوصي کتنځایونو، کلینکونو او سینګار توکو پلورنځیو څخه ۲۸۰ قلمه له نېټې تېر مواد او د خوراکي توکو پلورنځيو او تولیدي شرکتونو څخه هم ۱۷۶۰ قلمه له نېټې تېر او بېکیفیته خوراکي توکي راټول شوي دي.
سربېره پر دې، د يادو نظارتونو په ترڅ کې ۸۶ روغتیايي کارتونه او ۸۷ د مسلکي فعالیت کارتونه هم وېشل شوي او ۴ بابه د درملو عمده پلورنځیو ته د فعالیت جوازونه ورکړل شوي دي.
