د نري رنځ نړیواله ورځ ونمانځل شوه
د هېواد د عامې روغتیا وزارت د نري رنځ نړیواله ورځ "وخت تېږېږي، راځئ چې د نري رنځ هر ناروغ ته پاملرنه وکړو تر سرلیک لاندې ونمانځله ."
په دې ناسته کې د عامې روغتیا سرپرست وزیر ډاکټر وحید مجروح؛ د نري رنځ ناروغي په نړۍ کې د وژونکو ناروغیو له لسو لوی لاملونو څخه یوه وبلله او زیاته یې کړه: چې د دې ورځ له نمانځلو څخه موخه په هېواد کې د نري رنځ ناروغي د له منځه وړلو لپاره د ژمنې تجدید او همدارنګه د روغتیایي او غیر روغتیایي کار کوونکو، د نړیوالو همکارانو له کړنو او هڅو ستاینه چې په دې برخه کې یې له موږ سره همکاري کړې ده.
د عامې روغتیا وزارت سرپرست زیاته کړه: " تېر کال د کورونا ویروس په خپرېدو او په هېواد کې د محدودیتونو سره سره، شاوخوا زموږ۷۳۰۰۰ تنه هېوادوال د نري رنځ په ناروغۍ اخته شوي، چې له دې جملې څخه زموږ روغتیایي همکارانو د خپلو وړتیاوؤ پر اساس وکولائ شو چې له ۵۰۰۰ زرو زیاتې پېښې وپېژني او تر درملنې لاندې ونیسي، مګر د دوی له ډلې ۹۸۰۰ تنو خپل ژوند له لاسه ورکړ.
سربېره پردې، ډاکټر مجروح په هېواد کې د نري رنځ ناروغۍ په له منځه وړو کې د عامې روغتیا وزارت لاسته راوړنې لکه: د روغتیایي مرکزونو پراختیا، د تشخیصي میتودونو پراختیا او په هېواد کې د نري رنځ او کورونا ویروس ناروغانو د پېژندلو لپاره د جن اکسپرت ټکنالوژۍ څخه په کار اخیستلو یادونه وکړه او ګډونوالو ته یې لا زیات معلومات ورکړل.
دغه راز د دې ناستې په دوام د روغتیا سرپرست وزیر ډاکټر وحید مجروح او په افغانستان کې د متحده ایالاتو د سفارت شارژدفیر ښاغلي راس ویلسن ترمینځ د تفاهم نامه لاسلیک شوه، ترڅو دغه بنسټ د راتلونکو پنځو کلونو لپاره د نري رنځ په وړاندې مبارزه کې د افغانستان روغتیا سکتور سره مالي او تخنیکي همکاري وکړي.
ښاغلي ویلسن په دې ناسته کې د افغانستان له روغتیا سکتور سره د خپل هېواد د دوامداره همکاري خبر ورکړ زیاته یې کړه: "متحده ایالات ژمن دی چې د راتلونکو پنځو کلونو لپاره د نري رنځ له منځه وړلو ملي پروګرام سره مالي او تخنیکي همکارۍ وکړي ترڅو هغه ننګونې چې دا پروګرام ورسره مخ دی ورته لاسرسی وشي، او همدارنګه د افغانستان خلکو لپاره په کور دننه د تشخیص او درملنې زمینه برابره شي خلک د دې هیواد درملنه باید وشي او د دې خلکو لپار په کور دننه د درملنې او تشخیص زمینه برابره شي ترڅو د درملنې لپاره بهر ته د دوی له تګ څخه مخنیوئ وشي.
په ورته وخت کې، ډاکټر مجروح د افغانستان د روغتیا سکتور سره د روغتیا د ټولو نړیوالو همکارانو، په ځانګړي توګه متحده ایالاتو، د مرستې او همکارۍ مننه وکړه او ژمنه یې وکړه چې دغه مرستې به په ولایتونو، ولسوالیو او کلیو کې په شفاف او عادلانه ډول له اړتیا سره سم واستوي.
له بلې خوا، د دې ناستې په لړ کې د نري رنځ د ناروغانو له منځه وړلو بورډ رئیس مېرمن سیما ثمر، په افغانستان کې د ملګرو ملتونو د پراختیايي ادارې د څانګې استازې مېرمن سورایو او د روغتیا سازمان استازي د نري رنځ نړیوالې ورځ د نمانځلو په پار خبرې وکړې او په دې برخه کې د افغانستان د عامې روغتیا وزارت سره د دوی د همکاریو پر دوام یې ټینګار وکړ.
