د پکتیکا ولایت ۷۵ بستریز ملکي روغتون ۱۵۰ بستریززوغتون ته ارتقاء وموند
دوشنبه، جوزا ۱۶/ ۱۴۰۱
د پکتیکا ولایت چارواکي وايي، چې د دغه ولایت ملکي روغتون له ۷۵ بستريز څخه ۱۵۰ بستريز ته لوړ شوی، چې په دې سره به د دغه روغتون روغتیايي خدمات ښه شي او خلکو ته به ښې اسانتیاوې برابرې شي.
د پکتیکا والي مولوي عبدالله مختار په دې اړه په جوړه شوې غونډه کې وویل: اسلامي امارت ژمن دی چې د عامې روغتیا او نورو برخو د پیاوړتیا او په هیواد کې دننه خلکو ته د ناروغيو د مخنیوي په موخه په مسؤلیت سره کار وکړي ترڅو بهر ته د خلکو د تګ څخه مخنيوى وشي.
د دغه ولایت د عامې روغتیا رئیس حکمت الله عصمت وویل: د دغه ولایت د ملکي روغتون له پراختیا سره به د روغتیايي کارکوونکو شمېر زیات شي او د اړو کسانو د روغتیا ساتنې په موخه به د تشخیص وارډونه پرانستل شي.
بل پلو یو تن قومي مشر او د پکتیکا د عامي روغتیا شورا پخواني رئیس حاجي سیدالله د اسلامي امارت او اړوندو روغتیايي بنسټونو له همکارۍ او ژمنو څخه مننه وکړه او ویې ویل: د دغه روغتون په پراختیا سره به دغه ستونزې هوارې شي.
