د افغانستان ا.ا د عامې روغتیا وزیر، ښاغلي مولوي نور جلال جلالي او مل پلاوي بلخ ولایت ته د سفر په ترڅ کې د روغتونونو له مسؤلینو او روغتیايي کارکوونکو سره لیدنه وکړه
په دې لیدنه کې روغتیايي مسؤلینو خپلې غوښتنې شریکې او د تشکیل د کمښت، طبي وسایلو، امبولانسونو او نورو اړینو تجهیزاتو د برابرولو غوښتنه یې وکړه.
د عامې روغتیا وزیر، د بلخ ولایت د روغتیاپالانو هڅې وستایلې، هغوی ته یې د لا زیاتو بریاوو هیله څرګنده او د کار د دوام لپاره یې وهڅول. هغه همداراز، د روغتیايي کارکوونکو د معاشاتو ښه والي، په ولسوالیو کې د روغتونونو د جوړېدو له لارې په مرکزي روغتونونو کې د مراجعینو د ګڼې ګوڼې کمېدو، د اکمال تخصص برنامې د ازموینو شفافیت او منظم سیستم رامنځته کېدو په اړه وویل: چې په دې برخو کې عملي ګامونه اخیستل شوي او چارې به یې ژر بشپړې شي.
ښاغلي وزیر ډاډ ورکړ، د وزارت له داخلي بودجې څخه به بلخ ولایت ته اړین طبي وسایل برابر او د زون په کچه به د خدمتونو کیفیت لا پیاوړی شي.
دغه راز، د پلان او پالیسۍ لوی رئیس، ډاکټر سید رسول منګل د روغتیايي سکتور د پراختیا، پالیسیو او راتلونکو پروګرامونو په اړه هر اړخیز معلومات وړاندې او زیاته یې کړه، عامې روغتیا وزارت هڅه کوي د پلان شویو پروګرامونو له لارې د خدماتو کچه لوړه او د خلکو اړتیاوو ته اغېزمن ځواب ووایي.
