د افغانستان اسلامي امارت د عامې روغتیا وزیر ښاغلي ډاکټر قلندر عباد نن په قطر هيواد ، دوحه کې د روغتیايي برخې د مرسته کوونکو سازمانونو په ناسته کې ګډون وکړ
ښاغلي وزير د خپلې وينا پر مهال د روغتیایي سیستم په ریفورم، مشترک نظارت، د روغتیا د برخې په خودکفايئ ،د کليو او ولسواليو په کچه د روغتيايي خدماتو معياري کولو او هر اړخيزو روغتيايي خدماتو وړاندې کولو څخه يادونه وکړه او ټينګار يې وکړ چې په دې ټولو مواردو بايد کار وشي.
نوموړي د روغتيا په برخه کې له نړيوالو همکارانو څخه وغوښتل چې د زياتو اداري مصارفو کمولو او د مرستو په سم او درست ډول رسولو باندې بايد لا کار وشي.
ښاغلي وزير وويل ، که د زياتو اداري مصارفو مخنيوی وشي د روغتيايي خدماتو په برخه کې په لګښتونو به خورا مثبت اثر ولري.
نوموړي همدا راز ټینګار وکړ ، د افغانستان د کنګل شوې سرمايې او ملکيتونو ازادول به د مور او ماشوم روغتيا ته د رسیده ګۍ لپاره خورا مؤثر ثابت شي ، د افغانستان د روغتيايي سیستم د خپلواکه کیدو ، د روغتیایي خدمتونو د پراختيا او معیاري کیدو لپاره يو ستر او مثبت ګام وي چې بايد نړیوال يې پورته کړي.
