د بلخ ولایت د عامې روغتیا ریاست د ابو علي سینا سیمه ییز روغتون لابراتوار څانګه د شاوخوا ۵ میلیونه افغانیو په ارزښت په ۱۱ پرمختللو طبي ماشینونو سمبال شوې ده
په دې نوې نصب شویو دستګاوو کې د کیمیاوي موادو دوه اتومات دستګاوې، دوه هیماتولوژي دستګاوې، د کیمیاوي موادو دوه نیمه اتومات دستګاوې، د وینې د غلظت دوه دستګاوې، د هورموني موادو دوه دستګاوې او یوه د وینې د ګازاتو تحلیل کوونکې (ABG) دستګاه شامله ده.
د دې وسایلو د پرانیستلو او فعالولو مراسم د بلخ ولایت د عامې روغتیا رئیس الحاج رحمت الله منصور، د یاد ریاست د مرستیال ډاکټر سید احمد شاداب، د سیمه ییز روغتون روغتیایي کارکوونکو او ډیری نورو مسؤلینو په شتون کې ترسره شول.
د یادونې وړ ده، چې د دې وسایلو په فعالولو سره به د سیمه ییز روغتون لابراتوار د معیاري تشخیص لپاره نور هم پیاوړی شي او د ناروغانو د درملنې پروسه به ګړندۍ او اغېزمنه شي.
