د روغتیايي خدمتونو وړاندې کولو مرستیال د مانکي پاکس ناروغۍ د مخنیوي اړوند له داخلي او نړیوالو همکارانو سره لیدنه ترسره کړه
د افغانستان اسلامي امارت د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د تېرو ناستو په دوام د مانکي پاکس (بیزو تڼاکې) ناروغۍ د مخنیوي اړوند له داخلي او نړیوالو همکارانو سره لیدنه ترسره کړه
په دې لیدنه کې، چې د روغتیا، یونیسیف او کډوالۍ نړیوالو سازمانونو استازو او د وزارت یو شمېر مرکزي رئیسانو شتون درلود، د روغتیايي خدمتونو وړاندې کولو مرستیال، ښاغلي مولوي عبدالولي حقاني د مانکي پاکس ناروغۍ د مخنیوي او کنټرول په برخه کې د یادو سازمانونو او د وزارت یو شمېر ریاستونو اړوند، کاري کمېټو د ترسره شویو چارو د راپور اورېدنې ترڅنګ په دې برخه کې د چارو د لا چټکتیا، لازمو تدابیرو نیولو او اسانتیاوو برابرولو اړوند لازمې سپارښتنې ترسره کړې.
د روغتیايي خدمتونو وړاندې کولو مرستیال دغه راز وویل: " که څه هم په افغانستان کې تر دې دمه د دې ناوړه ناروغۍ کومه مثبته پېښه نه ده ثبت شوې، خو موږ باید په سمه توګه چمتوالی ولرو؛ ترڅو هېوادوال مو له بیزو تڼاکې او ورته نورو ساري ناروغیو څخه وژغورل شي".
