د عامې روغتیا وزارت د خصوصي سکټور د تنظیم او همغږۍ رئیس، ډاکتر احمد خندان د ختیځ زلزله ځپلو ته د مرستې لپاره د خصوصي سکټور له استازو سره د همغږۍ او بېړنۍ رسېدنې په موخه ناسته ترسره کړه
په دې ناسته کې د سختو حالاتو پر مهال د خصوصي روغتیایي بنسټونو پر مهم رول ټینګار وشو او د کابل ولایت د خصوصي روغتونونو مسوولینو د بشپړې همکارۍ ډاډ څرګند کړ.
د یادې ناستې په پایله کې مهمې پرېکړې وشوې، چې په کې د کابل ولایت خصوصي روغتونونو ته د درملنې لپاره د شاوخوا ۱۴۰۰ ټپیانو وړیا انتقال، ۴۰ مجهز امبولانسونه له روغتیایي کارکوونکو سره کونړ ولایت ته لېږل او اغېزمنو سیمو ته د بشر دوستانه مرستو لکه درملو، طبي وسایلو، جامو، کمپلو او خوراکي توکو لېږل شامل دي.
د خصوصي سکټور د تنظیم او همغږۍ رئیس د خصوصي روغتونونو له مرستو مننه وکړه او په لا زیاتې همغږۍ او د مرستو پر دوام یې ټینګار وکړ، هغه له ټولو روغتیایي بنسټونو وغوښتل، چې د اسلامي او انساني روحيې له مخې په دې ملي بهیر کې فعاله ونډه واخلي.
