د عامې روغتیا وزارت د خوړو او درملو مرستیال، ښاغلي مولوي حمدالله زاهد " افغان روغتیا " نندارتون کې ګډون تر سره او د دغه نندارتون له محصولاتو یې لیدنه وکړه
د عامې روغتیا وزارت د خوړو او درملو مرستیال، ښاغلي مولوي حمدالله زاهد د دې معینیت د بېلا بېلو برخو رئیسانو په ملتیا ( افغان روغتیا) نندارتون کې چې د عامې روغتیا وزارت، صنعت او سوداګرۍ وزارت، وهاج شرکت او د ایران سفارت په همکارۍ د درې ورځو لپاره جوړ شوی و، ګډون وکړ او د کورنیو او بهرنيو شرکتونو له محصولاتو او خدماتو یې لیدنه وکړه.
د خوړو او درملو مرستیال، د خپلې وینا پر مهال د دې نندارتون له جوړوونکو او ګډونوالو څخه مننه وکړه او زیاته یې کړه، چې دا ډول راټولېدنې د هېوادونو ترمنځ د اړیکو د پیاوړتیا، د تجربو د تبادلې او د تنظیمي سیستم د لا پیاوړتیا لپاره د سوداګرۍ او تخنیکي همکارۍ د پراختیا لامل ګرځي.
همداراز، ښاغلي مرستیال د تېرو څلورو کلونو د هغو لاسته راوړنو په اړه ګډونوالو ته هر اړخیز معلومات وړاندې کړل، چې د یاد معینیت له لوري د درملو، روغتیایي محصولاتو او وارداتي او تولیدي خوراکي توکو د کیفیت، خوندیتوب او مؤثریت د ښهوالي لپاره تر سره شوي دي.
د یادونې وړ ده، چې د هېواد د کورنیو شرکتونو تر څنګ له ۴۰ څخه زیاتو سترو ایراني شرکتونو په دغه نندارتون کې ګډون کړی و، چې د خپلو محصولاتو د نندارې ترڅنګ یې په هېواد کې د درملو د تولید په برخه کې د پانګونې ژمنه هم وکړه.
