د عامې روغتیا وزارت فعال روغتیايي ټیمونه ۲۴ ساعته د کونړ زلزله ځپلو هېوادوالو په خدمت کې دي
د عامې روغتیا وزارت د بیړني غبرګون لسګونه روغتیایي ټیمونه لا هم د کونړ ولایت په زلزلهځپلو سیمو کې په فعال ډول بوخت دي او د زلزلې قربانیانو ته یې د روغتیايي خدمتونو لړۍ روانه ساتلې ده.
د عامې روغتیا وزارت له لوري دغه ټیمونه چې د مرکز او ختیځو ولایتونو څخه کونړ ته لېږل شوي، د لومړنیو روغتیايي مرستو، درملنې، د ټپيانو د ژوند ژغورنې او اړینو روغتیايي خدمتونو وړاندې کولو په برخه کې شپه او ورځ هڅې کوي تر څو ټولو قربانیانو ته پر وخت رسېدنه وشي.
د عامې روغتیا د وزارت د رهبرۍ په ځانګړې لارښوونه یاد روغتیايي ټیمونه به تر هغه د پېښې په ځای کې خپلو فعالیتونو ته دوام ورکړي څو د زلزلهځپلو هېوادوالو روغتیايي اړتیاوې په بشپړ ډول پوره شي او د خلکو ژوند له هر ډول احتمالي خطر څخه خوندي وساتل شي.
د عامې روغتیا وزارت رهبري ډاډ ورکوي چې د پېښې د اغېزمنو کسانو د ملاتړ لپاره به له ټولو امکاناتو کار واخلي او د اړتیا په صورت کې به نورې روغتیايي ډلې هم سیمې ته واستوي.
