د عامې روغتیا وزارت مرستیال د ننګرهار زلزلهځپلو سیمو ته د روغتیایي خدمتونو د چټک رسولو په موخه د تطبیق کوونکو مؤسسو له مسؤلینو سره وکتل
ا.ا.ا د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني ننګرهار ته د سفر په ترڅ کې د تطبیق کوونکو او یو شمېر نورو مؤسسو له مسؤلینو سره لیدنه تر سره کړه
په دې لیدنه کې چې د ننګرهار د عامې روغتیا رئیس، مولوي امین الله شریف هم شتون درلود، د روغتیايي خدمتونو وړاندې کولو مرستیال، د یادو مؤسسو استازو ته جدي سپارښتنه وکړه، چې د زلزلې قربانیانو ته د رسېدنې په موخه خپل فعالیتونه او مرستې لا چټکې کړي.
د عامې روغتیا وزارت له لوري په دې برخه کې یوه ځانګړې کمېټه ټاکل شوې، چې د لومړنیو روغتیايي خدمتونو په چمتو کولو کې د مؤسسو له استازو سره همکاري وکړي او د ټولو روغتیايي خدمتونو څار وکړي؛ ترڅو په ښه ډول د زلزله ځپلو هېوادوالو روغتیایي وضیعت ته رسېدنه وشي.
د یادونې وړ ده، چې د عامې روغتیا وزارت له لوري به په هغو ولایتونو کې چې زلزلې ځپلي وي، د درملو او روغتیايي کیټونو زېرمې او ګرځنده روغتیایي مرکزونه فعالیږي؛ تر څو ناروغانو ته په ښه او هر اړخیز ډول رسېدنه وشي.
