د عامې روغتیا وزیر د افغانستان لپاره د برطانیې له شارژدافیر رابرټ ډیکسون سره لیدنه ترسره کړه
د افغانستان اسلامي امارت د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د برطانیې له شارژدافیر رابرټ ډیکسون سره لیدنه ترسره کړه
په دې لیدنه کې لرې پرتو سیمو کې د روغتیايي مرکزونو جوړېدو، د سرطان او روږدو ناروغانو د درملنې برخه کې د اسانتیاوو رامنځته کېدو او د روغتیا په برخه کې د نړیوالو مرستو د جلب اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي وویل: "د عامې روغتیا وزارت ژمن دی، چې د نورو برخو ترڅنګ سرطان او روږدو ناروغانو د درملنې برخې کې اسانتیاوې رامنځته کړي، چې په همدې موخه یې په تېرو دریو کلونو کې د زرګونو روږدو ناروغانو درملنې سربېره د سرطان ناروغانو لپاره د اسانتیاوو رامنځته کېدو په موخه یو ځانګړې مرکز هم پرانیستی؛ ترڅو په اسانۍ سره یې ستونزو ته رسېدنه ترسره شي".
ښاغلي وزیر همداراز د روغتیا په برخه کې د نړیوالو روغتیايي ادارو همکاري اړینه وګڼله او د یاد هېواد له شارژدافیر څخه په دې برخه کې د همکارۍ غوښتونکی شو.
بل لور د برطانیې شارژدافیر په روغتیايي برخه کې د بشپړۍ همکارۍ ډاډ څرګند کړ.
