د عامې روغتیا وزیر د کونړ په مؤقت روغتون کې د زلزله ځپلو د درملنې بهیر وڅاره
د ا.ا.ا. د عامې روغتیا وزیر، ښاغلي مولوي نور جلال جلالي د کونړ ولایت خاص کونړ ولسوالۍ په نظامي قرارګاه کې د وروستۍ زلزلې له امله زیانمنو شویو ته د عامې روغتیا وزارت له لوري په نوي جوړ شوي مؤقت روغتون کې بستر ناروغانو ته د وړاندې کېدونکو روغتیايي خدمتونو له بهیر څخه لیدنه وکړه
په یاده لیدنه کې د عامې روغتیا وزیر، د وروستۍ زلزلې له امله د زیانمنو شویو ناروغانو احوال له نږدې واخیست، د هغوی د روغتیا هیله یې څرګنده او له روغتیايي مسئولینو یې مننه وکړه، چې په داوطلبانه توګه د کونړ زیانمو شویو هېوادوالو ته خدمات وړاندې کوي.
د عامې روغتیا وزیر همداراز ډاډ څرګند کړ، چې زیانمنو شویو هېوادالو ته به د غوره روغتیايي خدمتونو وړاندې کولو په موخه لا زیاتې اسانتیاوې برابرې کړي.
ښاغلي وزیر دغه راز زیاته کړه، چې د خاص کونړ ولسوالۍ په نظامي قرارګاه کې یې مؤقت روغتون په دې موخه په لنډ وخت کې جوړ کړ، تر څو د زلزلې له امله زیانمنو شویو ناروغانو لومړنۍ درملنه پر وخت ترسره او بیا نورو روغتونونو ته ولېږل شي.
