د عامې روغتیا وزیر سویس هیواد ته سفر تر سره کړ
د افغانستان اسلامي امارت د عامې روغتیا وزیر ښاغلي مولوي نورجلال جلالي د روغتیا په برخه کې د پرمختګونو ، اصلاحاتو او د نړیوالو اداراتو د عامې روغتیا له وزارت سره د ښې همغږۍ په موخه له مل پلاوي سره سویس هیواد ته سفر تر سره کړ:
ښاغلي وزیر د دې سفر پر مهال د روغتیا نړیوال سازمان له عمومي مشر ډاکټر ټیډروس او ورسره مل پلاوي سره د لیدنې سربېره د بیلا بیلو نړیوالو ادارو په مجالسو کې ګډون تر سره او د روغتیا په برخه کې د همکارو اداراتو له عمومي مسؤولینو سره یې په افغانستان کې د ساري ناروغیو پر کنټرول ، د پولیو ناروغۍ محوه کولو او د روغتیايي خدماتو پر پراختیا ، شفافیت او لا معیار خبرې اترې تر سره کړې.
د یاد سفر پر مهال د نړیوالو اداراتو د مسؤولینو له لوري د روغتیا په برخه د دوامدارې همکارۍ تعهد څرګند او د لا همکارۍ ژمنه یې وکړه ، د عامې روغتیا وزارت هڅه کوي تر څو د هیواد ټولو وګړو ته معیاري او عادلانه روغتیايي خدمات وړاندې کړي چې په همدې موخه د خپلې داخلي بودیجې تر څنګ پر نړیواله کچه د روغتیایي خدماتو د معیاري کولو هڅې یې ګړندۍ کړي دي.
