د وارداتي شرکتونو مسؤلینو ته له قاچاق څخه د مخنیوي قانون په اړه د پوهاوي غونډه تر سره شوه
یاده غونډه د عامې روغتیا وزارت د خوړو او درملو معینیت له لوري د روغتیايي محصولاتو او درملو واردتي شرکتونو مسؤلینو ته د یاد معینیت په تالار کې تر سره شوه، چې په کې د خوړو او درملو مرستیال، ښاغلي مولوي حمدالله زاهد، د یاد معینیت د بېلا بېلو څانګو او وارداتي شرکتونو مسؤلینو ګډون کړی و.
د خوړو او درملو مرستیال، مولوي حمدالله زاهد، د درملو واردونکو شرکتونو مسؤلینو له شتون څخه مننه وکړه، د دې غونډې موخه یې د درملو، روغتیايي محصولاتو او خوراکي توکو د قاچاق مخنیوي په اړه پوهاوی یاد کړ او ویې ویل: د خوړو او درملو معینیت د یوې تنظیمي ادارې په توګه، د درملو او خوراکي محصولاتو د کیفیت او خوندیتوب ډاډمن کولو او ټولو هېوادوالو ته په مناسب قیمت د وړاندې کولو مسؤلیت لري او دې موخې ته د رسېدو لپاره اړینه ده، ټول هغه قوانین چې د اسلامي سرچینو پر بنسټ ترتیب شوي او د افغانستان اسلامي امارت د مشرتابه له لوري توشیح شوي، ضرور باید تطبیق شي او موږ یې بشپړ پلي کولو ته ژمن یو.
